Rjóminn (beta)

Rjómalagið 9. september: WU LYF – We Bros

Guðmundur Vestmann — Fri, 09 Sep 2011 13:57:25 +0000

„We Bros“ er tekið af frumraun bresku rokksveitarinnar WU LYF. Platan nefnist Go Tell Fire to the Mountain og kom út í byrjun sumars. Rétt eins og lagið þá er platan mikil snilldarsmíð og endar vafalaust á árslistanum mínum þetta árið. Ég vil meira segja ganga svo langt og segja að þetta sé það albest sem ég hef heyrt koma út úr bresku rokksenunni í langan tíma. Já, ég veit: stór orð! Meðlimir lýsa músíkinni sem heví poppi – og það er kannski ekki svo fjarri lagi.

WU LYF – We Bros

Nýtt lag frá Snorra Helga

Rjóminn — Thu, 08 Sep 2011 21:36:37 +0000

Snorri Helgason hefur sent frá sér nýtt lag í spilun og er það að finna á nýútkominni breiðskífu hans, Winter Sun. En platan er einmitt plata vikunnar á rás 2 um þessar mundir. Lagið er hressilegur söngur um „Julie“ en hún er með græn augu og kirsuberjarauðar varir.

Snorri situr ekki auðum höndum þó svo að hann dvelji að öllu jöfnu í Lundúnaborg og hefur nýverið leikið á tónleikum í Helsinki og Tallinn. Á döfinni eru svo tónleikar á The Troubadour í London en þar hafa margir snillingar leikið listir sínar, eins og til dæmis Bob Dylan, Jimi Hendrix og Led Zeppelin. Í byrjun október mun Snorri koma fram á tónleikum á Íslandi og svo að sjálfsögðu koma fram á Airwaves tónlistarhátíðinni.

Tommy

Egill Harðar — Thu, 08 Sep 2011 14:29:31 +0000

Fortíðarljóminn hefur heltekið mig undanfarna daga. Nýlega tók ég mig til og gróf upp rokkóperuna Tommy sem The Who gáfu út 1969. Sjálfur hef ég mest dálæti á tónlistinni við kvikmyndaútgáfuna af Tommy sem leikstýrt var af Ken Russell og kom út 1975 en þar eru í aðalhlutverkum Roger Daltrey, söngvari The Who, ásamt þeim Ann-Margret, Oliver Reed, Eric Clapton, Tina Turner, Elton John og Jack Nicholson.

Meðfylgjandi eru brot úr myndinni þar sem þeir Elton John og Eric Clapton eru í aðalhlutverkum. Elton sem „The Champ“ og Clapton sem „The Preacher“. Ég ætla ekki að fara nánar út í söguþráð myndarinnar en mæli eindregið með að áhugasamir skelli sér á næstu leigu og leigi sér eintak. Svo verður auðvitað ekki hjá því komist að velta því fyrir sér hvort leikhúsin hér á landi taki sig ekki til að setji verkið upp í staðin fyrir að hjakka á Hárinu eða Jesus Christ Superstar enn eitt skiptið enn?

Elton John – Pinball Wizard

Eric Clapton – Eyesight To The Blind

Samaris – Hljóma þú

Egill Harðar — Wed, 07 Sep 2011 16:09:05 +0000

Frumburður hljómsveitarinnar Samaris leit dagsins ljós fyrir um mánuði síðan í formi laglegrar EP plötu. Heitir gripurinn Hljóma þú og inniheldur platan þrjú lög auk remix-a eftir Futuregrapher, Muted og DJ Arfi. Fóru upptökur fram í Tónlistarskóla Kópavogs en um masteringu sá Sundlaugarvörðurinn Birgir Jón Birgisson.

Hljóma þú fæst að sjálfsögðu hjá gogogyoko

Rjómalagið 7. september: Future Islands – Balance

Guðmundur Vestmann — Wed, 07 Sep 2011 12:23:34 +0000

Það er sjaldan sem ég missi mig yfir nýbylgju rafpoppi en tríónum Future Islands tókst þó að heilla mig rækilega með þessu lagi sínu. Það er tekið af væntanlegri þriðju breiðskífu bandsins sem nefnist On the Water. Platan kemur út á vegum Thrill Jockey þann 11. október. Í kaupbæti leyfi ég svo að fylgja með fyrsta singúlnum, Before the Bridge.

Future Islands – Balance

Future Islands – Before the Bridge

Hermigervill leikur fleiri íslenzk lög

Rjóminn — Wed, 07 Sep 2011 12:12:33 +0000

Tónlistarmaðurinn Hermigervill mun gefa út geisladiskinn Hermigervill leikur fleiri íslenzk lög mánudaginn 12. september. Þar er að finna 10 íslenskar dægurlagaperlur í nýjum búningi, þar á meðal hið sívinsæla „Gvendur á eyrinni“, hið hugljúfa „Ég veit þú kemur“ og hið hressilega „Partýbær“. Platan hefur nú þegar verið gerð fáanleg á tónlistarvefnum www.tonlist.is í sérstakri forútgáfu, viku fyrir formlegan útgáfudag. Til gaman hefur tónlist.is tekið saman spilunarlista með upprunalegum útgáfum laganna og geta tónlistarunnendur skemmt sér við það bera saman nýjar útgáfur við þær gömlu.

Hermigervill mun fylgja plötunni eftir með tónleikahaldi í október og kemur meðal annars fram á Airwaves tónlistarhátíðinni.

Hermigervill leikur fleiri íslenzk lög

Hlustaðu á Hysterical

Guðmundur Vestmann — Wed, 07 Sep 2011 12:04:42 +0000

Nú líður senn að því að maðurinn með skrítnu röddina, Alec Ounsworth, og félagar hans í Clap Your Hands Say Yeah sendi frá sér sína þriðju breiðskífu – eftir fjögurra ára bið! Tvær smáskífur komu út í sumar, lögin „Maniac“ og „Same Mistake“, og hljómuðu bæði bara nokkuð vel. Hljómsveitin ákvað að fara þá leiðina að gefa út sjálfir, en platan er væntanleg þann tuttugasta þessa mánaðar. Hinsvegar er hægt að taka forskot á sæluna og streyma plötunni í heild hér.

Clap Your Hands Say Yeah – Maniac

Clap Your Hands Say Yeah – Same Mistake

Sólskinspopp með sækadelískum barokk undirtón

Egill Harðar — Wed, 07 Sep 2011 10:00:46 +0000

Meðfylgjandi er meixteip, ef svo má kalla, sem ég setti saman í einhverju fortíðarljómakasti um daginn. Þarna má finna hundgamla en afar áheyrilega slagara sem gleðja ættu jafnt hal og sprund. Ágætis mótefni við grámyglunni sem nú leggst yfir allt.

Uppselt á Iceland Airwaves – og enn fleiri listamenn tilkynntir

Kristján Guðjónsson — Tue, 06 Sep 2011 11:12:07 +0000

Fréttatilkynning frá Iceland Airwaves:

Nú í morgun seldust upp síðustu miðarnir á Iceland Airwaves, fimm vikum fyrir hátíð. Aldrei hefur selst upp svo fljótt og því ríkir mikil gleði hjá skipuleggjendum Iceland Airwaves.

Auk þess eru tilkynntir rúmlega 80 listamenn til viðbótar við þann fríða flokk sem þegar hefur verið kynntur. Listamennirnir eru Mugison, Sinéad O’Connor (IE), James Murphy DJ set (US), Dikta, Iceage (DK), Mr. Silla, Blaz Roca, Raised Among Wolves (DK), Adda, Beatmakin Troopa, Biggibix, Bix, Bypass, Captain Fufanu, Caterpillarmen, Cheek Mountain Thief, Dimma, DJ AnDre, Dream Central Station, Elín Ey, Emmsjé Gauti, Fist Fokkers, Fu-Kaisha, Gang Related, Gnúsi & Amabadama, Guðrið Hansdóttir (FO), Hamferð (FO), Hazar, Helgi Jónsson, Helgi Valur and the Shemales, Hellvar, Hermigervill, IKEA SATAN, Jafet Melge, Jón Jónsson, Jungle Fiction, Kiriyama Family, Krummi, Leaves, Legend, Leif Vollebekk (CA), Ljósvaki, Lockerbie, Mammút, Markús and the Diverion Sessions, Mimas (DK), Momentum, Muck, Mukkaló, Musik Zoo, Muted, Natasha Fox (US), Nóra, Ojba Rasta, Orphic Oxtra, Our Lives, Panoramix, Pétur Ben og Eberg, PLX, Pornopop, Q4U, Quadruplos, Rabbi Bananas, Rafgashaus, Skorpulifur, Skurken, Song for Wendy (DK), Spacevestite, Stereo Hypnosis, Súr, Svavar Knútur, The Dandelion Seeds, The Way Down, The Wicked Strangers , Thulebasen (DK), Trouble , Úlfur Úlfur, Vigri , We Made God, Yagya, Ylja, Þórunn Antónía og Æla.

Sagan í verslanir í dag

Rjóminn — Tue, 06 Sep 2011 09:07:42 +0000

Hljómsveitin 1860 gefur í dag út sína fyrstu breiðskífu sem ber heitið Sagan. Útgefandi á Íslandi er Konunglega siglingasambandið en unnið er að útgáfu í Bandaríkjunum á vegum Gravitation Records. Titill plötunnar er bæði skírskotun í sagnahefðina innan þjóðlagatónlistar og einnig til heiðurs vísindamanninum Carl Sagan en hljómsveitarmeðlimir sækja mikinn innblástur í verk hans. Platan inniheldur þrettán lög, bæði á íslensku og ensku, og þar á meðal eru „Snæfellsnes“ og „Orðsending að austan“ sem hafa gert góða hluti í útvarpi þetta sumarið.

Af tilefni plötunnar ætla drengirnir að bjóða fólki að koma á Hemma og Valda miðvikudaginn 7. september í hlustunarpartý. Þeir sem mæta snemma geta fengið fríkeypis veigar á meðan birgðir endast og að auki ætla strákarnir að selja plötuna á spottprís. Einnig gæti vel hugsast að meðlimir 1860 grípi í hljóðfærin og taki nokkur órafmögnuð lög. Skipulagning er hafin á glæsilegum útgáfutónleikum og verða þeir auglýstir síðar.

1860 – Snæfellsnes

1860 – Snæfellsnes

Nýtt myndband frá Apparat Organ Quartet

Egill Harðar — Mon, 05 Sep 2011 13:23:47 +0000

Hér að ofan er nýjasta myndband félaganna í Apparat Organ Quartet af plötunni Pólýfónía og er það við lagið „123 Forever“. Höfundur myndbandsins er Gerda Klotz.

Nýtt lag af væntanlegri plötu Morgan Kane

Egill Harðar — Mon, 05 Sep 2011 10:31:12 +0000

Hljómsveitin Morgan Kane var að klára að taka upp síðasta lagið af væntanlegri plötu og heitir það „A lonely impulse of delight“. Enn hefur ekkert spurst út um væntanlegan titil eða útgáfudag plötunnar en ætla mætti að sveitin stefni á að ná eins og einni öldu í Jólaflóðinu.

Morgan Kane – A lonely impulse of delight

Morgan Kane – A lonely impulse of delight

Sóley gefur út We Sink á heimsvísu

Rjóminn — Sat, 03 Sep 2011 12:09:43 +0000

Tónlistarmaðurinn Sóley Stefánsdóttir hefur sent frá sér breiðskífuna We Sink. Platan kom út í gær, út föstudaginn 2. september, samtímis um allan heim hjá þýska útgáfufélaginu Morr Music en Kimi Records annast útgáfu hér á landi. We Sink er fyrsta breiðskífa Sóleyjar en fyrir rúmu ári síðan kom út stuttskífan Theater Island. Sóleyju þekkja margir sem liðsmann Seabear og Sin Fang en stígur hér fram sem fyrsta flokks tónlistarmaður og lagahöfundur. We Sink kemur út á geisladiski og tvöfaldri vínylplötu. Sóley er þessa dagana stödd á tónleikaferðalagi um Evrópu við kynningu á plötunni en kemur til með að halda útgáfutónleika í októberbyrjun.

We Sink er tekin upp af Sóleyju sjálfri með dyggri aðstoð Sindra Más Sigfússonar, Héðins Finnssonar og Birgis Jóns Birgissonar, Sundlaugavarðar. Umslagshönnun var í umsjá Ingibjargar Birgisdóttur en einnig er að finna myndverk eftir hana á hlið 4 á vínylplötunni. Ljósmyndir tók Sigfús Már Pétursson.

Sóley – Smashed Birds

I Break Horses

Egill Harðar — Fri, 02 Sep 2011 13:13:23 +0000

Eitt af því besta sem borist hefur mér til eyrna nýlega eru tvö lög með hljómsveitinni I Break Horses en hún gaf út plötuna Hearts í síðasta mánuði hjá Bella Union. Umrædd lög má heyra hér að neðan en af þeim verður hið fyrra, „Winter Beats“, að teljast töluvert límkenndara. Svona gerist popp best í dag að mínu mati.

I Break Horses – Winter Beats

I Break Horses – Winter Beats

I Break Horses – Hearts

Plaid snýr aftur

Guðmundur Vestmann — Thu, 01 Sep 2011 13:14:43 +0000

Bresku rafmongúlarnir í Plaid hyggjast hefja upp raust sína að nýju í haust. Átta ár eru liðin síðan Spokes, síðasta eiginlega breiðskifa dúettsins, leit dagsins ljós og því kannski alveg kominn tími til. Þessi nýja plata nefnist Scintilli og mun innihalda 13 glænýja smelli – þar af 3 sem nú þegar hafa ratað á alnetið. Fyrsta upplag af plötunni er gætt þeim göldrum að hægt er að breyta artworkinu í einskonar japanska pappírslist (sjá skýrirmynd hér að neðan). Að vanda gefur raftónlistar-mekkað Warp Records gripinn út og hægt verður að fjárfesta í eintaki þann 26. september.

Plaid – Missing (af Scintilli)